بنگلہ دیش نے پاکستان کے خلاف 2 میچوں کی سیریز کے پہلے ٹیسٹ میں ٹاس جیت کر پہلے باؤلنگ کرنے کا فیصلہ کیا جب کہ مہمان ٹیم نے 3 وکٹوں کے نقصان پر 57 رنز بنا لیے ہیں۔
بنگلہ دیش نے ٹاس جیت کر باؤلنگ کرنے کا فیصلہ کیا، عبداللہ شفیق 2، کپتان شان مسعود 6 اور بابر اعظم بغیر کوئی بنائے آؤٹ ہوئے۔
پاکستان اور بنگلہ دیش کے درمیان راولپنڈی میں جاری پہلا ٹیسٹ میچ گیلی آؤٹ فیلڈ کے باعث تاخیر کا شکار ہوا ہے۔
میچ صبح 10 بجے شروع ہونا تھا لیکن صبح سویرے اسٹیڈیم اور اس کے اطراف 10 ملی میٹر تک بارش ریکارڈ کی گئی جس کے باعث گراؤنڈ گیلا ہوگیا، میچ آفیشلز نے گراؤنڈ کا معائنہ کیا اور آؤٹ فیلڈ گیلی ہونے کے باعث ٹاس تاخیر کا شکار ہوا جب کہ گراؤنڈ کو خشک کرنے کا کام جاری رہا۔
بعد ازاں آفیشلز کی جانب سے معائنے کے بعد ٹاس ہوا جسے جیتنے کے بعد بنگلہ دیش نے پہلے فیلڈنگ کا فیصلہ کیا اور کھیل کے آغاز پر ہی اسے پہلی کامیابی اس وقت ملی جب عبداللہ شفیق 2 رنز بناکر آؤٹ ہوگئے۔
ان کے بعد کپتان شان مسعود بھی صرف 6 رنز بنا ک پویلین لوٹ گئے جب کہ بابر اعظم بغیر کوئی بنائے آؤٹ ہوئے۔
پہلے دن کا کھیل دوپہر 2 بج کر 30 منٹ پر شروع ہو، پہلے روز 48 اوورز کا کھیل ہوگا۔
قبل ازیں، دونوں ٹیمیں راولپنڈی کرکٹ اسٹیڈیم پہنچیں، ٹیموں کو ہوٹلز سے اسٹیڈیم تک آمد کے دوران شاہراہ پر ٹریفک نہیں تھی جبکہ کڑی سیکیورٹی فراہم کی گئی۔
ٹیموں کی موومنٹ کے دوران راولپنڈی سے آئی جے پی راولپنڈی سیکشن پر میڑو بس سروس بھی مکمل بند رکھی گئی۔
سی پی او راولپنڈی خالد ہمدانی اور ایس ایس پی آپریشن حافظ کامران اصغر خود سیکیورٹی انتظامات کی نگرانی کر رہے ہیں۔
واضح رہے کہ پاکستان اس وقت آئی سی سی ورلڈ ٹیسٹ چیمپئن شپ میں چھٹے نمبر پر ہے، اس نے چیمپئن شپ میں دو سیریز کھیلی ہیں، سری لنکا کے خلاف اس نے 2 صفر سے کامیابی حاصل کی تھی جبکہ آسٹریلیا کے خلاف اسے 3 صفر سے شکست کا سامنا کرنا پڑا تھا۔
پاکستان اس سیزن میں 9 ٹیسٹ میچ کھیلے گا جو 99-1998 کے بعد سے اس کا مصروف ترین ٹیسٹ سیزن ہے، ان میں سے 7 ٹیسٹ میچ پاکستان میں کھیلے جائیں گے جن میں بنگلہ دیش کے خلاف دو اکتوبر میں انگلینڈ کے خلاف تین اور اگلے سال جنوری میں ویسٹ انڈیز کے خلاف دو شامل ہیں۔
بنگلہ دیش کے خلاف پہلا ٹیسٹ میچ پاکستان کے ریڈ بال ہیڈ کوچ جیسن گلیسپی کی اس سال اپریل میں اپنی تقرری کے بعد پہلی بین الاقوامی اسائنمنٹ ہے، یہ شان مسعود کا بطور کپتان ہوم سرزمین پر پہلا ٹیسٹ میچ بھی ہو گا جس سے ٹیم کے لیے ریڈ بال کرکٹ میں ایک نئے دور کا آغاز ہو گا۔
